Անհուն երկինք՝ աչքերու մէջ
նոր

Անհուն երկինք՝ աչքերու մէջ

Զաւէն Պիպեռեան

18,00 

Etiket Fiyatı: 24,00 

%25
Սեռ՝Բանաստեղծութիւն
Լեզուն՝Հայերէն
Խմբագիր՝

Սեւան Տէյիրմենճեան

Կողքի ձեւաւորում՝

Արէտ Կըճըր

Տպագրութեան մասին՝

Ա տպագ., Յունիս 2021

Էջն ու չափերը՝

96 էջ, 13x19,5 սմ

ISBN

9786052100981

Բացատրութիւն՝

Զաւէն Պիպեռեան, որ հայալեզու գրականութեան անդաստանին վրայ տիրական անունմըն է իր վէպերով ու պատմուածքներով, առաջին անգամ ընթերցողին կը ներկայանայ չափածոյ գործերով։ Առանձին հատորով մը իրենց առաջին հրատարակութեան արժանացող այս քերթուածները ո՛չ միայն երիտասարդ հեղինակի մը գրական որոնումներուն մասին կը վկայեն, այլ նաեւ առիթ կու տան ծանօթանալու այն տողերուն, որոնց ան ապաստանած է ամէն անգամ որ անարդարութեան ենթարկուի ազգային ինքնութեան բերմամբ։ Պիպեռեան ինքնակենսագրութեան մէջ կը խոստովանի, որ պատանեկան շրջանին գտնուած է Լամարթինի վիպապաշտութեան ազդեցութեան ներքոյ, որու արգասիքը հանդիսացող քերթուածներուն մէջ կարելի է նշմարել իր վէպերուն յատուկ մութ կողմեր։ Իսկ իր սիրոյ քերթուածները, զորս Պիպեռեան սկսած է գրել ապագայ կնոջ հետ ծանօթացած շրջանին, ընթերցողներուն առիթ կու տան յայտնաբերելու հեղինակի անձնական կեանքի ծալքերը։ Գիրքին մէջ տեղ տրուած է նաեւ Պիպեռեանի ֆրանսերէն քերթուածներուն ու անոնց թարգմանութիւններուն։ Գրողի անձնական թողօնէն լոյսին հանուած այս ստեղծագործութիւնները թերեւս իմաստալից նուէր մը ըլլան գրողի ծննդեան 100-ամեակի այս շրջանին։

Ետեւի կողքը՝

Բիբերուդ մէջ տեսայ լիճը,

Պայծառ լիճը մեր երկրին,

բիբերուդ մէջ տեսայ երգը

Ու ծիծաղը հերոսական

Լեռնակուտակ զոհերուն մեր,

Ու կեանք, ու խանդ,

Ու կենսաբուխ ուխտը մեր կարծր հողին

Ու կարծր մարդոց հերոսական:

Դուն քնացիր

Ես կը հսկեմ քու վրադ։

 

Ննջէ՛, եղիր հսկան ահեղ,

Եւ բիբերէդ ժայթքէ բիւրեղ,

Ու կայծ, ու շանթ,

Երկրաշէն հուր աշխատութեան,

Ննջէ՛, եղիր բանուորն հզօր

Ու վեր կանգնէ,

Պրկէ բազուկդ

Սալին վրայ գոռահնչիւն

Ապագային մեր վարդագոյն:

Դուն քնացիր.

Ես կը հսկեմ քու վրադ:

Հեղինակին մասին՝

Զաւէն Պիպեռեան

Ծնած է 1921-ին, Պոլսոյ Չենկելգիւղ թաղը։ Յաճախած է Գատըգիւղի Արամեան-Ունճեան, Տիպար կրթարան (Սուլթանեան) եւ Սեն Ժոզեֆ վարժարանները, բարձրագոյն կրթութիւնն ալ ստացած՝ Առեւտրային գիտութեանց ակադեմիայէն։

Աշխատակցած է պոլսահայ ու սփիւռքահայ մամուլին, երբեմն մաս կազմելով նաեւ անոնց խմբագրակազմերուն։ Քաղաքական ճնշումներու հետեւանքով 1949-էն սկսեալ քանի մը տարի, մինչեւ 1953 թուականը, բնակութիւն հաստատած է Պէյրութ։

Պիպեռեան ունեցած է նաեւ քաղաքական գործունէութիւն. 1965-ի խորհրդարանական ընտրութիւններուն եղած է երեսփոխանական թեկնածու՝ Թուրքիոյ Բանուորական կուսակցութեան շարքերէն։ 1968-ի քաղաքային մարմիններու ընտրութիւններու արդիւնքին նոյն կուսակցութեան անունով ընտրուած է Իսթանպուլի քաղաքապետական խորհուրդի անդամ, եղած՝ այդ խորհուրդին փոխ-նախագահը։

Գրականութեան առընթեր սիրողաբար հեղինակած է գեղանկարներ, արձանիկներ, շինած՝ խաղալիքներ. Մեծ կղզիի հանդէպ ունեցած է պաշտամունքի հասնող սէր մը։

Մահացած է 4 հոկտեմբեր 1984-ին, Պոլիս։ Թաղուած է Շիշլիի ազգային գերեզմանատան մտաւորականներու թաղը։

Գործածած է հետեւեալ գրչանունները՝ Անի Ազատ, Սեւանի Մակուկավարը, Զ. Բարտիեան, Պ. Զ. Շիրակ, Ք. Անանեան, Նեմեզիս, Կինօֆիլ. եւն.:

Զաւէն Պիպեռեանի հեղինակային գիրքերն են՝

«Մեղապարտ Ոսկին կամ աբեղայի մը Գողգոթան» (անթուակիր, հաւանաբար լոյս տեսած է 1953-էն առաջ)։

• «Լկրտածը» (վէպ, 1959, 2020), հեղինակային թարգմանութիւնը՝ Yalnızlar (վէպ, 1966, 2000), ֆրանսերէն թարգմանութիւնը՝ La traînée (Ժընեւ, 2015)։

• «Ծովը» (պատմուածքներ, 1961, 2017):

• «Անկուտի սիրահարներ» (վէպ, 1962, 2017), թրքերէն թարգմանութիւնը՝ Meteliksiz Âşıklar (2017)։

• «Մրջիւններու վերջալոյսը» (վէպ, 1984, ամբողջական հրատարակութիւնը՝ 2007, 2021), թրքերէն թարգմանութիւնը՝ Babam Aşkale’ye Gitmedi (1998), Karıncaların Günbatımı (2019) ֆրանսերէն թարգմանութիւնը՝ Le crépuscule des fourmis (Ժընեւ, 2012)։

Car vivre, c’était se battre et faire l’amour (յետմահու հրատ., 2019):

«Անհուն երկինք՝ աչքերու մէջ» (բանաստեղծութիւններ, 2021)։

Sitemize giriş yaparak kişisel verileriniz, site kullanımınızı analiz etmek, sosyal medya özellikleri ve reklamları kişiselleştirmek amacıyla çerezler aracılığıyla işlenmektedir. Detaylı bilgi için Çerez Politikası Metni’ni okuyabilirsiniz. Anladım butonuna tıklayarak açık rıza beyanında bulunmuş olursunuz.