Շաւարշ Քահանայ Պալըմեան

Շաւարշ քհնյ․ Պալըմեան, ծնած Սեբաստիոյ հայաշատ Զառա գիւղին մէջ, 1960-ականներէն սկսեալ եղած է շրջուն հոգեւոր հովիւ գաւառի տարբեր քաղաքներուն ու գիւղերուն մէջ, ինչպէս՝ Ատանա, Մարտին, Տիյարպեքիր, Էլազըղ, այդ թուականներուն իսկ իրենց գոյութիւնը պահպանող հայ համայնքներուն համար։ Պալըմեան դէպի գաւառ կատարած իր այցելութիւնները վերածած է առիթի մը՝ պեղելու, ուսումնասիրելու, յայտնաբերելու հայ ժողովուրդի նիւթական ու հոգեւոր ժառանգութեան մնացորդացը, զորս վկայագրած է ալ մամլոյ էջերուն վրայ տպագրած յօդուածաշարքերով, տակաւին անտիպ ու անմշակ սեւագրութիւններով, ինչպէս նաեւ խօսուն լուսանկարներով։